Eflum landsbyggðina - kominn tími til að snúa óheillaþróun við!

Vegna eiturlyfjasmyglsins fengum við myndir í sjónvarpinu frá þessum fallegu stöðum Hornafirði og Djúpavogi. Mín tilfinning er sú að þeir beri æ sjaldnar fyrir augu á opinberum vettvangi. Sannleikurinn er sá að síðustu tveir áratugir hafa verið landsbyggðinni erfiðir.  Þar hefur heldur hallað undan fæti. það hefur fækkað í byggðunum og tekjur þar minnkað.  Tólf ára stjórnartímabil Sjálfstæðisflokks með þátttöku Framsóknarflokksins fór heldur illa með byggðirnar á Austurlandi enda Sjálfstæðisflokkurinn markaðssinnaður flokkur og auðvitað er það ekki markaðsvænt að hafa langt á milli fólks.  Við þurfum að snúa þessu við.  Við þurfum vinstri stjórn sem þorir að styrkja og efla byggðirnar. Við þurfum kvótann aftur heim og við þurfum að kanna það í viðræðum við Evrópusambandið hvort að byggð meðfram ströndinni um allt land myndi ekki styrkjast við inngöngu í bandalagið.  það er ýmislegt sem bendir í þá áttina.

Fiskiskip lét vita af skútunni

Samfylkingin fyrsti kostur og Atli til vara!

Samfylkingin verður væntanlega valkostur minn í þessum kosningum fyrst og síðast vegna Evrópumála.  Ég hef skrifað um það í bráðum tvö ár að það sé lífsnauðsynlegt fyrir Íslendinga,  að ganga í Evrópusambandið, að uppfylltum vissum skilyrðum, ef við ætlum ekki að eiga það á hættu að einangast hér í fátækt og basli næstu áratugina. Ég lít á Evrópusambandið sem nútíma og framtíðar samstarfsvettvang sjálfstæðra þjóða í Evrópu. Þetta er æ betur að koma á daginn.

Annars hugnast mér best efsti maður á lista Vinstri grænna hér í Suðurkjördæmi Atli Gíslason og myndi kjósa hann og Samfylkinguna ef kosningalöggjöfin byði upp á slíkt. Atli er alvöruframbjóðandi, alvöruþingmaður.  Vinnusamur, glöggur,  með hjartað á réttum stað.  Efsti maður á lista Framsóknar Sigurður Ingi dýralæknir er einnig ágætur fyrir sinn hatt. Verður þarfur maður á þingi sem minnir á málstað bænda og dreifbýlinga en ég er hræddur um að hann sjái ekki Evrópuljósið eins og ég.  Ég held að Sigurður Ingi sé hallur undir bændaforystuna sem spyrnir fótum við framtíðinni og tuðar nú um fæðuöruggi sem útleggst einangrun og tollamúrar sem er slæmt fyrir bændur sem aðra sé litið til lengri tíma.

ESB leiðin til farsældar!

Það er furðulegt og undarlegt að aðeins einn stjórnmálaflokkur, Samfylkingin, hafi það á stefnuskrá sinni að sækja um aðild að ESB. (Ég tel ekki Framsókn með sem vill sækja um með skilyrðum. Sú úrelta maddama er orðin vaklandi í þessu máli sem öðrum.  Bændaforystan og kaupfélag Skagafjarðar að ná yfirhöndinni). Allir hinir stefna að því að halda okkur utan bandalagsins og þar með (þó það sé ekki ætlun þeirra) í heljargreipum fátæktar og einangrunar um ókomna tíð. Undarleg er afstaða Vinstri grænna sem virðast hafa erft úrelta og upphafna þjóðernishyggju frá hinum alþjóðasinnuðu sósíalistum fortíðar. ESB er bandalag sjálfstæðra þjóða í Evrópu.  Nútíma birtingarmynd samstarfs sjálfstæðra þjóða í Evrópu.  Við erum þegar í forstofunni og höfum verið þar síðan á sjöunda áratugnum þegar við gengum í EFTA.  Aðeins óframfærnir aular hanga í forstofunni í stað þess að ganga til stofu.  Benedikt Jóhannesson ritar um þetta ágæta grein í Morgunblaðið í dag og hvetur hann þá sem vilja rísa úr öskustó og sækja um aðild að undirrita áskorun til stjórnvalda á vefsvæðinu www.sammala.is

Vantar eldmóð í stjórnarliða!

Ætla Vinstri Grænir og Samfylking að klúðra þessu fyrir kosningar?   Þeir láta Sjálfstæðisflokkinn komast upp með það að hræða fólk með skattahækkunum og þeir eru ógreinilegir um málsmeðferð þegar kemur að ESB.  Fólki er illa við ógreinilegan málflutning og fólk er alveg að gleyma því að Sjálfstæðisflokkurinn ber höfuðábyrgð á því hvernig komið er fyrir þjóðinni.  Það vantaði allan eldmóð í Helga Hjörvar og Katrínu Jakobsdóttur í diskúsjóninni í gær.  Skástu tilþrifin voru hjá Kalla Matt., Þráni Bertelssyni og Ástþóri.  Fulltrúi Framsóknar virkaði þungur og þreyttur (og ég skil það vel).  Illugi var hins vegar góður fyrir sinn hatt og fékk að tóna óáreittur.

Þöggun nafnlausra íhaldsdrengja!

Amx sem kallar sig fremsta fréttaskýringavef landsins en er vefur hægri manna sem vega úr lausátri gerir mér þann heiður að fjalla um bloggfærslu mína frá því í morgun þar sem ég fjalla um Sjálfstæðisflokkinn.  Ég held að ég sé ekki einn um þá skoðun að Mogginn hafi yfirleitt stutt þann flokk þó íhaldsdrengirnir blessaðir nafnlausir hafi ekki hugmynd um það.  Ég sé þó ástæðu til þess að árétta það að mér hefur líkað við Morgunblaðið á síðustu árum enda hef ég sjálfur ritað í það margar greinar og það er heimilisblað mitt. Hins vegar er ég logandi hræddur um blaðið nú undir nýjum eigendum að það verði aftur flokksblað.  Eða til hvers eru auðmenn að kaupa blöð? Hvers vegna keypti Jón Ásgeir Fréttablaðið? Svo lýsi ég frati á menn sem þora ekki að skrifa undir nafni sérstaklega þegar tilgangurinn er greinilega þöggun. Það er óheilbrigt í lýðræðissamfélagi.

Ísland; Spilltasta land í Evrópu?

Sjálfstæðisfokkurinn hefur alla mína hunds og kattartíð haft betri aðgang að fjármagni en aðrir flokkar. Hann hefur alla tíð notið meiri peningalegrar velvildar en aðrir flokkar í atvinnulífinu.  Þetta vita allir. Yfirburðir hans í íslenskum stjórnmálum hafa því að verulegu leyti byggst á peningum en ekki hugmyndum. Ofan í kaupið hefur Morgunblaðið stutt flokkinn leynt og ljóst. Ekki bara í leiðurum og Staksteinum heldur með öllum Morgunblaðslíkamanum mismunandi áberandi eftir tímabilum. Morgunblaðið var blað kaupmanna, blað efnamanna.  Þetta vita allir. Yfirburðastaða flokksins í íslensku þjóðlífi hefur verið vegna þessa, ekki út af frábærri hugmyndavinnu, hún hefur verið slök.  Ekki úr af frábæru fólki.  Það hefur ekkert verið síðra í hinum flokkunum.

Það er ekki fyrr en flokkurinn fer að óttast um einokun sína á peningamönnum sem sagt á Baugstíma  að hann ljær máls á fjárhagslegu eftirliti með flokkunum en svindlar þá og verður sér til skammar. Nú þarf að athuga framlög tíu ár aftur í tímann.  Einnig svæðisbundin framlög og framlög til einstaklinga í prófkjörum. Kannski er Ísland eitt spilltasta land Evrópu í pólitísku tilliti.

Hvernig fóru þeir að því að klúðra þessu svona svakalega?

Hvernig tókst flokki Bjarna Benediktssonar, Ólafs Thors og Jóhanns Hafstein að fara svona með arfleifðina?  Vissulega nutu þeir Bjarni, Ólafur og Jóhann vilvildar og stuðnings kaupmanna og á fyrstu áratugum flokkins (stofnaður 1929) þróast járnbundin tengsl við atvinnulífið sem stóð því síðar fyrir þrifum. Fræjum ófarnaðar var náttúrulega sáð þar.  Það mega ekki þrífast krosseignatengsl milli atvinnulífs og stjórnmála- það býður spillingunni heim. En af hverju var grunntónninn um lítið ríkisvald svikið.  Af hverju þandist það út á tíma Flokksins?  Það er höfuðsynd hægri flokks sem byggir á Adam Smith og Milton Friedman.  Skýringin er einfaldlega sú að á skemmri tíma en átján árum hætta menn að gera greinarmun á flokki og ríkisvaldi sem hættir þá til að þenjast út.  Það má auðveldlega greina í ræðum á landsfundi síðasta. Það var líka meðvirkandi ástæða fyrir því hvað allt fór verulega illa.  Menn hættu að gera greinarmun á því hvort þeir voru að tala saman sem flokksbræður eða sem fulltrúar almennings á ákveðnum póstum. Þetta sést berlega á samskiptum forsætisráðherra og seðlabankastjóra. Í þessu ástandi og í uppsveiflu geta menn gleymt grunngildum eins og þeim að halda ríkisvaldi í skefjum.

Allir helstu foringjar útrásarinnar voru Sjálfstæðismenn þ.m.t. Jón Ásgeir og Jóhannes í Bónus. Af hverju eru menn flokksbundir?  Svari hver fyrir sig? Þeir sem högnuðust á kvótaframsalinu fylgdu margir hverjir Framsókn fram yfir kosningarnar 2002 (þegar Framsókn auglýsti sem mest) en hölluðu sér að Sjálfstæðisflokknum fyrir kosningarnarnar 2006 (þegar Framsókn hafði ekki efni á að auglýsa). Af einhverjum ástæðum líður auðmönnum best í Sjálfstæðisflokknum.

Það kemst einginn til valda í svona flóknu fyrirbrigði eins og Sjálfstæðisflokknum nema hann sé klár og harðskeyttur (Guðlaugur Þór) eða njóti velvildar vegna ættar (Bjarni Ben) eða ættartengsla (Illugi).  Sennilega er tilkoma Bjarna Ben happ fyrir Sjálfstæðisflokkinn.  Ættarlaukar er alls ekki verstu laukarnir.  Þeir komast oft á toppinn án þess að hafa þurft að óhreinka sig.

Vonandi fer Sjálfstæðisflokkurinn ekki upp fyrir 25% í næstu kosningum.  Hann hefur haft óheilbrigð tök á íslensku samfélagi alveg frá millistríðsárunum.  Vonandi minnkar hann ekki mikið umfram það líkt og Framsókn (sem hefur sungið lokasönginn) því að það sem hann ætti að standa fyrir sparsemi í ríkisrekstri og heilbrigð samvinna við aðrar þjóðir á stöðugt erindi.  Í báðum þessum efnum hefur hann hins vegar brugðist. Ríkisvaldið hefur þanist út í tíð hans og flokkurinn með Evrópuafstöðu sinni kýs leið einangrunar.  Afstaða flokks Bjarna Benediktssonar, Ólafs Thors og Jóhanns Hafstein sem leiddu okkur í NATO og EFTA eru söguleg mistök sem mögulega geta leitt til einangrunar íslensku þjóðarinnar og í öllu falli skerðir lífskjör okkar verulega á næstu árum og áratugum gangi einangrunarstefnan eftir.

Verra en maður hélt!

Yfirleitt sögðu talsmenn flokksins að Sjálfstæðisflokknum væri sama þótt sett yrðu lög um fjárreiður stjórnmálaflokka en Jóhanna Sigurðardóttir flutti um það frumvarp árum saman. Sjálfstæðisflokkurinn væri ekki kostaður af stórfyrirtækjum heldur miklum fjölda félagsmanna þessarar breiðfylkingar.  Svo var því gjarnan bætt við að reglur væru hvort sem er gagnslausar og gott ef ekki af hinu illa því að það væri bara farið í kringum þær.  Nú er bara komið í ljós að það var ekki nokkur skapaður hlutur að marka þessa talsmenn og ástæðan fyrir því að Ísland var langseinasta landið í Vestur Evrópu til að setja lög um fjárreiður stjórnmálaflokka var sú að menn vildu hafa sína spillingu í friði.  Nú ættu menn ekki að unna sér hvíldar fyrr en bókhald flokkanna hefur verið opnað tíu ár aftur í tímann.

Nú er líka komið í ljós að spillingin blómstar í litlum ríkjum þar sem hægt er að  hafa kontról á hlutunum. Þetta er verra en maður hélt.

Skírdagur og íslensk spilling!

Líður á Dymbilviku.  Í dag, Skírdag , er dagur síðustu kvöldmáltíðarinnar.  Heilagur dagur í vitund kristinna manna um víða veröld. Jesú brýtur brauðið og gefur lærisveinum sínum og þeir bergja allir af  sama bikar.  Hvortveggja tákn þess að öll erum við á sama báti og okkur ber að deila með öðrum, sýna samhug, samkennd, vinarhug. Við erum jafningjar, enginn er öðrum æðri, enginn merkilegri en annar. Enginn á að njóta forgangs í krafti fjármuna, klíku eða neinnar annarrar ómálefnalegrar ástæðu. Öll erum við, samkvæmt kristinni hugsun, jöfn fyrir Guði og það á og skal endurspeglast í lýðræðissamfélaginu. Skoðum það hvernig íslenskt spillingarsamfélag þróaðist fram að hruni með táknrænan boðskap atburða Skírdagsins í huga. Reynum svo að rísa úr öskustónni. Reynum að byggja upp gagnsætt,spillingarlaust samfélag þar sem allir sitja við sama borð.

Réttlaust fólk fyrir dyrum úti!

Í dag áttunda apríl er alþjóðadagur Roma fólksins sem við köllum stundum sígauna hérlendis. Víðast hvar eru þeir beittir misrétti  - í Evrópu eru þeir víðast hvar minnihluti sem er níðst á – hagur þeirra borinn fyrir borð.

Þeim er yfirleitt mismunað á vinnumarkaði og skólakerfið vanrækir þá.  Komið hefur á daginn að hærra hlutfall Roma barna en eðlilegt getur talist er í skólum fyrir þroskahefta.

Við vitum að Roma fólkið hefur fallið illa inn í samfélagsskipun þá sem nú þekkist.  Þau leggja meira upp úr fjölskyldulífi, dansi og söng en aðrir.  Vegna þess að þeir smellpassa ekki inn í samfélagsskipanina hafa þeir iðulega orðið afgangs og útundan og hagsmuna þeirra ekki gætt. Klisjurnar vinna gegn þeim og gerir líf Roma oft á tíðum erfitt, bæði þeirra sem reyna að laga sig að samfélaginu og einnig hinna.  Þú lítur út fyrir að vera Roma:  Færð ekki vinnu. Lítur út fyrir að vera Roma: það er komið fram við þig af tillitsleysi og djöfulsskap. Rasismi heitir það.

Hitler strádrap Roma fólkið. Þeir hafa átt erfitt með að fá það inn í sögubækur.

Ég hef komið í hverfi Roma fólks í útjöðrum stórborga sem sendimaður Evrópuráðsins. Eymdin þar er ömurleg. Sérstaklega situr í mér Roma hverfið fyrir utan Kiev. Fullorðna fólkið er án vinnu, krakkarnir ekki í skóla, mörg ekki einu sinni skráð.  Þau fluttu á staðinn í upphafi Sovéttímans til að vinna í verksmiðju sem var svo lögð niður á níunda áratugnum.  Nú reyna borgaryfirvöld að koma þeim í burtu til að geta byggt blokkir.  Roma fólkið býr nefnilega ekki í blokkum það býr í húsum sem það reisti sjálft úr kassafjölum – án þess að hafa lóðaleigusamning. Réttaust fólk úti fyrir dyrum allsnægtanna.

Það komu nokkrir Rúmenskir Roma hingað í fyrra eða hitteðfyrra og spiluðu á hljóðfæri fyrir utan stórmarkaði.  Þeim var vísað úr landi líkt og þeir væru skepnur en ekki menn. Man ég það ekki rétt?