Ásgeir Elíasson

Ég votta aðstandendum Ásgeirs Elíassonar samúð mína.  Ásgeir náði gríðarlega miklum árangri sem þjálfari einkum á seinni helmingi níunda áratugarins en einnig á árum sem lágu þar að.  Sem leikmaður var hann mikil spilari og sem þjálfari lét hann lið sín spila. Spil og aftur spil var það sem hann lagði upp með og liðin sem hann þjálfaði léku ávallt skemmtilega knattspyrnu þar sem boltinn gekk vel á milli manna og liðið flæddi spilandi upp völlinn. (Andstæðan við þetta er stórkallaleg knattsyrna með löngum spyrnum fram völlinn).

Ásgeir mótaði heilu kynslóðirnar hjá Fram og Framliðið sem varð Íslandsmeistari  þrisvar á tímabilinu 1985 til 1989 var eitthvað það best spilandi lið sem spilað hefur í íslenskri deild.

Sem manneskja var Ásgeir indæll og almennilegur og mikil og eftirminnileg týpa. Einn af mínum uppáhalds í bransanum.

Athugasemdir

[Ómar Ragnarsson, 10.9.2007 kl. 12:14]

Tek undir hvert orð um Ásgeir. Hitti hann nýlega á ferð með sína menn til Akureyrar og ræddi stuttlega við hann, - sá hvernig hann var "einn af strákunum", ljúfur og elskulegur eins og alltaf þegar ég hitti hann.

[Úrsúla Jünemann, 10.9.2007 kl. 13:45]

Ásgeir fór allt of snemma frá okkur. Ég fékk að kenna með honum í stuttan tíma og betri starfsfélaga hef ég ekki haft.