Minnimáttarkennd Páls Vilhjálmssonar!

Af hverju geta menn ekki tekið upp þráð hér á netinu og rökrætt hann án þess að reyna í sífellu að gera lítið úr þeim sem setti rökin fram. Ég sé í þessu bullandi minnimáttarkennd! Páll Vilhjálmsson þessi sem alltaf er berjast við Baug, bregst við bollaleggingum mínum um tungumál með því að reyna að hæða mig. Hann lýgur til í upphafi um mína skoðun þegar hann segir:

 

,,Baldri Kristjánssyni finnst það sniðug hugmynd að skipta út íslensku fyrir ensku.”

 

Og dansar svo í kringum þessa fullyrðingu sína djúpt sokkinn í íslenska umræðuhefð að hæðast sem mest að meintum andstæðingi sínum.

 

Kristján B. Jónasson brást við grein minni með svipuðum hætti í gær.  Með því að reyna að hæðast að mér.  Hvað er að  þessum mönnum.  Geta þeir ekki tamið sér skynsamlega rökræðu?  Þeir eiga greinilega margt ólært. Halda þeir að þeir geri íslenskunni greiða með því að drepa niður umræðu með hroka sínum?

 

Þessir menn þyrftu að lofta út hjá sér!

 

Ég hvet fólk til þess að lesa grein mína ,,íslenskan sem einangrunartæki” með það í huga að henni er ætlað að vera innlegg í umræðu dagsins. Í henni eru engir dómar felldir um íslenskuna. Raunar er ég  talsmaður íslenskunnar en tel samt að hún sé ekki sú grundvallarnauðsyn þjóðar sem margir vilja vera láta!

 

Og þeir sem nota íslenskuna sem einangrunartæki gera henni lítinn greiða! 

 
.

Athugasemdir

[Heimir Lárusson Fjeldsted, 25.9.2007 kl. 10:51]

Kristilegu kærleiksblómin spretta.. kringum Samfylkinguna?

[María Kristjánsdóttir, 25.9.2007 kl. 10:58]

Þörf ábending þetta með að hæðast og gera lítið úr þeim sem setja fram einhver mál. Ætla að lesa í gegnum bloggin mín og sjá hvort ég geri þetta! Mig grunar að svo sé.

[Bjarni Kjartansson, 25.9.2007 kl. 11:57]

Ég er þér afar ósammála um orðfæð og hugsunarhamlandi áhrif okkar tungu.

Einnig tel ég alldeilis fráleitt, að líta svo á, að málsvæði okkar sé einangrandi.

Enskir skilja vel, að þekking á okkar tungu er þeim bráðnauðsyn til að varðveita og viðhalda sinni tungu.

Minnimáttarkennd og daður við þetta svonefnda fjölþjóðlega er aumkvunarverðir eiginleikar, aðallega bundnir við þá sem nefna sig jafnaðarmenn.

Gersemar, sem okkar menning er, í augum alflestra uppfræddra spekinga í útlandinu, er dýrari en svo, að við ættum að láta hana lausa fyrir örfáa silfurpeninga, líkt og virðist vera með skoðanir og túlkanir varaformanns ykkar á stefnumiðum Samfó.

 Megi þær aldrei verða, því þjóðhættulegar munu þær teljast og vonandi mun svo verða, í framtíðinni, að formælendur slíks verði taldir til þjóðkvislinga.

Miðbæjaríhaldið

[Ómar Ragnarsson, 25.9.2007 kl. 13:52]

Ef það er góð Alzeimers-vörn að brjóta heilann um tungumál er íslenskukunnátta álitleg leið. Ég sé ekki að kunnátta nágrannaþjóða okkar, Finna, Dana, Norðmanna og Svía í móðurmáli sínu hafi verið eða sé þeim fjötur um fót í alþjóðlegri samkeppni. 

Engin þessara þjóða virðist sjá tungumál sitt sem einangrunartæki eða sjá eftir þeim tíma og fé sem fer í að viðhalda móðurmálinu. 

Hins vegar ætti að byrja að kenna ensku sem allra fyrst í grunnskóla meðan nemendur eru á besta og næmasta aldri til tungumálanáms.

Vitna til orðtaks sem séra Emil Björnsson, okkar gamli lærifaðir, notaði oft: "Þetta ber að gera en hitt eigi ógert að láta."

Vísa að öðru leyti til bloggfærslu minnar í dag um þetta mál þar sem ég færi frekari rök að því að viðhalda stöðu íslenskunnar á sama tíma og við eflum getu þjóðarinnar á tungumálasviðinu.

Ólafur Ragnar Grímsson, forseti Íslands, er góður fulltrúi nýs tíma. Ég hef heyrt hann halda svo frábærar ræður blaðalaust erlendis á ensku að mér hefur jafnvel fundist hann betri í því tungumáli en íslensku. Samt lærði hann móðurmál sitt löngu fyrr.  

[Hafsteinn Viðar Ásgeirsson, 25.9.2007 kl. 21:26]

Góð ádrepa Baldur og tímabær. Páll þessi er afar illa haldinn af minnimáttarkennd hverju sem um er að kenna....?