Birgir Andrésson

Birgir Andrésson er jarðaður í dag. Ég minnist hans með hlýju og eftirsjá.  Hann var hlýr og elskulegur maður.  Svo vildi til að ég kannaðist við hann alla hans ævi ef svo má segja. Hann ólst upp  í Blindrablokkinni sem var steinsnar frá okkur og hann varð góður vinur Benna bróður míns.

Biggi náði því að vaxa upp og skapa sér nafn.  Hann settist líka í huga okkar margra og verður þar,  hlýlegur svo af bar, góður, áhugasamur um hag viðmælenda sinna, sérstakur drengur, engum öðrum líkur. Stór maður, umlykjandi.

Ekki varð nú þessi kunningsskapur að ræktaðri vináttu.En ætíð tókum við tal saman þegar við hittumst. Í minningunni gengur hann burt í frakkanum sínum.

Hann hverfur frá manni eins og raunar allt smám saman. 

Athugasemdir

[Sveinbjörn Kristinn Þorkelsson, 6.11.2007 kl. 18:15]

Já, blessuð sé minning Birgis Andréssonar.  Það er vel orðað hér að ofan að Birgir "settist í huga okkar margra og verður þar" Það var einnig svo með mig að ekki eignaðist ég vináttu Birgis, en kynni af honum á níunda áratug seinustu aldar leiddu til þess að æ síðan hefur hann verið mér minnistæður - á hlýjan og jákvæðan hátt.