Ofstæki bændaforystunnar!

Bændaforystan er á rangri braut. Hún berst gegn því sem verður með kjafti og klóm. Í stað þess að fjalla um samningsmarkmið okkar þegar kemur að landbúnaði hellir hún yfir bændur vitleysu eins og þeirri að Íslendingar missi yfirráð yfir auðlindum sínum, missi fullveldi sitt og landbúnaður leggist jafnvel af gangi Ísland í ESB (Bændablaðið 22. tölublað 2008).

Landbúnaðarforystan á að fara að dæmi Sjávarútvegsins og slípa til samningsmarkmið.  Það er vitræn vinna sem stuðlar að hag landbúnaðarins ef við förum inn í ESB.  Þetta er það sem forsvarsmenn sjávarútvegsins eru í óða önn að gera. Náist ekki viðunandi niðurstaða í samningum er ástæða til að leggjast á móti.

Allar líkur eru á því að Ísland gangi í ESB.  Það er líka tvímælalaust skynsamlegt.  En hvort sem við höldum þangað eða ekki munu tollar lækka á landbúnaðarafurðum. Alþjóðlegir samningar hníga allir í þá áttina.  Mikil aðlögun að þessum alþjóðlegu kröfum er framundan hér sem annarsstaðar. Góður inngöngusamningur um aðlögun að þessum nýja veruleika gæti verið besti kosturinn fyrir íslenskan landbúnað.  Slagorð eins og þau að Ísland muni missa yfirráð yfir auðlindum sínum og tapa sjálfstæði sínu eru hreinlega ekki sæmandi.

Farið að vinna.  Hættið að safna að ykkur Skandinövum sem voru alltaf á móti ESB. Bændum í Finnlandi, Svíþjóð og Danmörku hefur yfirleitt farnast vel innan ESB sérstaklega í þeim greinum sem höfðu forystumenn sem áttuðu sig á þeim breytingum sem urðu.

Ég hef alltaf haldið upp vörnum fyrir bændur og bent á að þeir hafi ekki verið á móti símanum heldur loftskeytum.  Ég hallast hins vegar að því eftir lestur síðasta Bændablaðs að ef núverandi forysta hefði verið þá hefði hún reynt að fylkja bændum gegn símaáformum Hannesar Hafstein. Slíkt er ofstækið.

Athugasemdir

[Valdimar Valdimarsson (IP-tala skráð) 21.12.2008 kl. 12:17]

Hefur þú kynnt þér hvernig ESB virkar?

Veist þú hvaða hlutverki "íslenskir" fulltrúar eiga að sinna innan ESB?

Jafn mikið og ég er á móti bandaríkjamönnum í mörgum málum, hvað er að því að líkt og að ganga í ESB. að taka upp einhliða Dollar?

kveðja Valdimar

[Baldur Kristjánsson, 21.12.2008 kl. 12:24]

Velkomnir strákar á heimasíðu mína!  Viðar:  Texti þinn bendir til þess að þú þolir illa skoðanir annarra. Valdimar: Já, ég hef kynnt mér þessi mál mjög vel.  Kv. B

[Haraldur Hansson, 21.12.2008 kl. 12:55]

Sæll Baldur.
Vissulega ættu bændur að slípa til samningsmarkmið ef til inngöngu kæmi. Og líkurnar eru til staðar. En hvort það sé skynsamlegt er síður en svo tvímælalaust. Þá væru engar deilur um málið.

Burtséð frá aðildarsamningi og hvað hann kynni að gefa í útgerð, landbúnaði og orkumálum, þá þurfum við að skoða sambandið sjálft. Ekki hvernig það er í dag heldur hvernig það verður eftir gildistöku Lissabon samningsins.

Því betur sem ég kynni mér málið (og ég hef lagt umtalsverða vinnu í það) því fráhverfari verð ég Evrópuríkinu. Það væri að mínum dómi slys að gera Ísland að hluta af því.

Þetta er eitt af því sem mér líkar ekki.

[Gísli Baldvinsson (IP-tala skráð) 21.12.2008 kl. 16:01]

Það sem HB meinar er fulltrúalýðræðið innan ESB. Gott og vel þing ESB er ekki eins og þjóðþing, en... eitt aðildarríki getur fellt valdaafsal sbr Lissabonsamninginn. Þetta er allt saman spurningin um kosti eða galla. Gallarnir eru sannarlega til en óþarfi að einblína á þá. Kostirnir eru margfallt fleiri og rök bænda býsna sérkennileg. Þar er í engu horft á tækifæri landbúnaðarins.

[Hjálmtýr V Heiðdal, 21.12.2008 kl. 18:36]

Ég hjó einmitt eftir því sem forystumaður bænda sagði í útvarpsviðtali. Það mátti á honum skilja að allar okkar auðlindir sópuðust burt við inngöngu í ESB. Þessi þvæla er endurtekin í sífellu líkt og talið um glatað fullveldi. Gera andstæðingar ESB sér ekki grein fyrir því að enginn þjóð er eyland í dag. Hagkerfið er alþjóðlegt og kreppan sýnir það skýrt. Íslendingar hafa nú þegar misst hluta síns gamla fullveldis. En við erum samt sjálfstæð þjóð svo langt sem það nær á tímum landamæralausra viðskipta. Með því að ganga í ESB getum við elft okkar fullveldi frá því sem nú er. Auðlindir eru ýmist í einkaeigu eða sameign þjóðar - a.m.k. í orði kveðnu sbr. kvótakerfið. Svo mun verða áfram þótt regluverkið sem fylgja ber við nýtinguna verði mótað með sameiginlegum ákvörðunum.

Það eina sem hægt er að gera í okkar stöðu núna er að hefja aðildarviðræður. Hvert þær leiða kemur í ljós - eftir það getur forystumaður bænda talað út frá staðreyndum. Ekki fyrr.

[Sigurður Bogi Sævarsson (IP-tala skráð) 21.12.2008 kl. 19:54]

Búnaðarforystan hélt á dögunum fund um Evrópumál, þar sem norskur landbúnaðarleiðtogi flutti einræðu um hve afleitt Evrópubandalagið væri og hversu vel þeim Norðmönnum hefði farnast vel að standa utan vébanda þess. En hefði ekki verið nær hjá í þessu fundahaldi að fá fulltrúa öndverðra sjónarmiða, til að reifa sín sjónarmið. Efalítið eru margir bændur Evrópusinnaðir og sjónarmiðum þeim ætti forysta Bændasamtakanna að sýna virðingu með því að leyfa öndverðum sjónarmiðum að koma fram. Orðið er frjálst?

[Olgeir (IP-tala skráð) 21.12.2008 kl. 22:55]

Ég hef lengi litið á ESB sem eitthvert vandræða skrifræðisbákn sem við þyrftum að forðast í lengstu lög.Eflaust eru einhverjir kostir sem fylgja fullri inngöngu,en ég held að það sé mikill barnaskapur að halda að við fáum þar miklu ráðið. Við yrðum þar líkt og títuprjónshaus í helvíti  og ættum frekar að reyna að taka upp dollar ef krónan er ónothæf. Með kveðju

[Sigurður Þórðarson, 22.12.2008 kl. 03:15]

Þetta er ekki gott efni í jólahugvekju.

Sjávarútvegurinn er heill og óskiptur í því að vilja ekki fara í ESB.

Það eru miklir óhappamenn sem koma Íslandi á vonarvöl og vilja fórna fullveldinu og helstu auðlind þjóðarinnar, sjávarútveginum, í von um að geta þegið baunadisk. 

[Baldur Kristjánsson, 22.12.2008 kl. 09:04]

Sæll Sigurður og aðrir!  Við snúum okkur nú að jólahugvekjum, sem ég hef reyndar skrifað nokkrar.Sjáumst í ESB innan 30 mánaða, eða svo!  Jólakveðja.  Baldur

[Sigurður Þórðarson, 22.12.2008 kl. 09:38]

Gleðileg jól!

[Steinn Hafliðason, 22.12.2008 kl. 09:44]

Eftir að hafa lesið bæði bændablaðið og pistilinn þinn hljómar þú nú meira eins og þar fari ofstækismaður á ferð heldur en pistlarnir í Bændablaðinu. Og Hjálmtýr, þegar fólk segir "það eina sem hægt er að gera" þá missi ég yfirleitt áhugann því það gefur sterkar vísbendingar þröngsýni og á frekar við um ævintýramyndir úr Hollywood en pólitíska umræðu.

[Hjörleifur Guttormsson, 22.12.2008 kl. 10:21]

Ljóst er af pistli Baldurs Kristjánssonar að þar fer maður sem er sannfærður um ágæti ESB-aðildar. Það er hans mál. Hins vegar færir hann ekki fram rök heldur innihaldslausar staðhæfingar. Þarflaust er að sækja um aðild að ESB til að sjá framan í samning sem Íslandi stæði til boða. Þeir kostir sem bjóðast felast í reglum ESB, sáttmálum og tilskipunum. Þar við bætist svo óvissan sem fylgir Evrópudómstólnum sem breytt getur grundvellinum, því að hann dæmir út frá markmiði ESB um aukinn samruna í átt að ríkisheild.

Lofum Baldri að lifa við trú sína en stöndum á rétti okkar og gefum ekki þumlung eftir af því fullveldi sem þó enn höfum. Við getum tekist á hér innanlands, en eftir að valdið er komið úr landi til fjarlægra stjórnstöðva ESB er orðið erfitt um vik. 

[Baldur Kristjánsson, 22.12.2008 kl. 10:39]

Sæll Hjörleifur! Sé ég trúaður þá ert þú það ekkert síður þó með öfugum formerkjum sé. Tilgangur þessa pistils míns var að segja þá skoðun mína að viturlegra væri fyrir bændur að slípa til sín samningsmarkmið heldur en að leggjast í skotgrafir. Mér finnst eftir lestur síðasta Bændablaðs að bændaforystan óttist ekki ESB heldur nútímann. Hvort sem okkur líkar betur eða ver þá er verslun yfir landamæri að aukast í heiminum, tollar fara lækkandi og við getum ekki búist við að fá frísverslun með okkar fiskafurðir en viðjhalda hömlum á innflutningi landbúnaðarafurða. Frumvarp landbúnaðarráðherra um innflutning á hráu kjöti er dæmi um viðurkenningu á þessari staðreynd. Því fyrr sem landbúnaðurinn lagar sig að þessum nútíma því betra fyrir hann. Í samningaviðræðum við ESB gæti náðst fram skynsamlegur aðlögunartími. Kv. B

[BjornE (IP-tala skráð) 24.12.2008 kl. 03:51]

Til hvers var barist fyrir sjálfstæði Islands. Hvernig getur islenskur maður mælt með afsali alls þess sem barist var fyrir.

 Af hverju kemurðu þér ekki burt í sæluna, Baldur landráðamaður.  Þú værir kallaður quislingur í Norvegi. Skammastu þín.

[Hafsteinn Viðar Ásgeirsson, 24.12.2008 kl. 12:23]

Það er nú einhver annar hér sem þarf að skammast sín, en mér virðist hann þeirrar tegundar að hann sé ekki líklegur til afreka á þeim vettvangi, en eins og krakkarnir segja "fyrsti stafurinn er BjornE" og megi hann hafa skömm fyrir innlitið og þröngsýnina.

[Baldur Kristjánsson, 24.12.2008 kl. 12:56]

Takk fyrir Hafsteinn!