Byggjum vindrafstöðvar - festumst ekki í úreltum virkjunarhugmyndum!

Samkvæmt frétt frá Iðnaðarráðuneytinu yrði hagkvæmt að byggja vindrafstöðvar hér á landi. Máttum vita það og það er einfalt að benda á besta staðinn til slíks.  Fyrir sunnan og vestan Þorlákshöfn er tugir ferkílómetra af ónotuðu landi við vindótta suðurströndina.  Þarna mætti koma upp þúsundum vindrafstöðva og framleiða allt það rafmagn sem þarf  í kíslverksmiðjur, gagnaverksmiðjur, gróðurhús og til lýsingar íbúðarhúsa. Ef við gerðum þetta gætum við lagt af í meira lagi hæpnar ráðagerðir um að leggja fallegt og gott land við neðanverða Þjórsá undir lón og hætt við úreltar hugmyndir um Bitruvirkjun. Við verðum að geta hugsað hlutina upp á nýtt og megum ekki festast í úreltum hugmyndum.

Þá eigum við auðvitað að stórauka rannsóknir á því hvernig nýta megi sjávarstrauma til orkuframleiðslu.

Athugasemdir

[Jakob Þór Haraldsson, 22.4.2009 kl. 12:36]

ÉG er búinn að nefna í 35 ár mikilvægi þess að virkja hérlendis "vindorkuna & hafstraumanna", en þetta fábjána land er með ólíkindum....

kv. Heilbrigð skynsemi

[Ketill Sigurjónsson, 22.4.2009 kl. 15:32]

Úr skýrslunni:

"Gríðarleg vindorka er á Íslandi og ekki er ólíklegt að virkjun þessarar auðlindar sé raunhæfur og hagkvæmur kostur að einhverju marki hér á landi. Um þetta er þó ekki unnt að fullyrða nema ráðist verði í sérstakar rannsóknir og ennþá nákvæmari mælingar á vindi á áhugaverðustu svæðunum. Sérstaklega þarf að mæla vindinn í meiri hæð en gert hefur verið fram til þessa."

Það er m.ö.o. nauðsynlegt að framkvæma ákveðnar rannsóknir til að unnt sé að meta hagkvæmnina. En nokkuð góðar líkur eru á að vindrafstöðvar séu góður kostur á einhverjum svæðum á Íslandi. 

 

[Baldur Kristjánsson, 22.4.2009 kl. 15:44]

Sjá orkublogg Ketils Sigurjónssonar http://askja.blog.is/blog/askja/

Væntanlega byggði fréttin sem ég heyrði á skýrslu hans. Nú þyrfti að hefja nánari rannsóknir við Þorlákshöfn. Þetta er vistvæn og yndisleg framleiðsla og vindrafstöðvar minna á geimengla. Kv. B

[Hólmfríður Pétursdóttir, 22.4.2009 kl. 16:27]

Ég er ekki viss um að sá hvinur og suð sem þessir englar gefa frá sér sé neinn geim-  eða himnahljómur.

Með þessu er ég ekki að hafa neitt á móti því að þessi kostur sé rannsakaður í alvöru. Minnir reyndar að hagleikamaður á Akureyri hafi varið miklum tíma og drjúgum frjármunum til að hanna nýtt afbrigði svona vindrafstöðva.

Ekki vantar landrými hér, en sums staðar í útlandinu er fólk á móti því að hafa svona skóga í nágrenni við byggð.

[Sigurður G. Tómasson, 22.4.2009 kl. 16:40]

Sæll Baldur!

Fyrir löngu var bent á mikilvægi vindorku og nokkrar tilraunir voru gerðar fyrir svo sem mannsaldri, m.a. þar sem átti að breyta vindorku í hita. Eitthvað held ég að lítið hafi orðið úr þessu og m.a. var það skýrt með því að hér væri of vindasamt, hvassviðri of tíð. En auðvitað á að kanna þetta. Mig grunar samt að hagkvæmasta orkuöflun Íslendinga nú kunni að felast í orkusparnaði, enda erum við einir mestu orkusukkarar á jörðinni!

Gleðilegt sumar!

[Sigurður Ásbjörnsson, 22.4.2009 kl. 17:54]

Helst vildi maður sjá Vestmannaeyjar og Grímsey sjálfum sér nógar um raforku með því að virkja vindinn.

[Lára Hanna Einarsdóttir, 22.4.2009 kl. 20:53]

Tek undir efni pistilsins og ég heyrði í Katli í útvarpinu með sínar skilmerkilegu skýringar.

En innlegg Sigurðar G. er alveg hárrétt. Það verður að kenna þjóðinni að spara orku og hætta sukkinu. Hins vegar má ekki á móti auka orkusóun og byggja jarðgufuvirkjanir sem nýta ekki nema 10-15% af orkunni. Það er fullkomlega óforsvaranlegt.

[Anna Benkovic Mikaelsdóttir, 22.4.2009 kl. 22:01]

Vindorka er nokkuð sem við höfum nóg að!  Hvernig væri að læra af Hollendingum?

[Ingimundur Bergmann, 23.4.2009 kl. 00:07]

Allt er þetta nú gott og blessað, vindorkan er góð, en ekki ein sér.

Virkjum Þjórsá! En auðvitað ekki skilyrðislaust, virkjum ekki til þess eins að virkja. Sjónvarpsfólkið heldur að það þjóni einhverjum tilgangi að virkja virkjunarinnar vegna en það er vitanlega ekki þannig. Orkuna þarf að nota í eitthvað arðbært, en vindorkan er ágæt með öðru og hægt að safna í lónin á meðan blæs.