Les ekki Egil framar!

Las hjá Agli Helgasyni (eyjan.is) að hann hefði veikleika fyrir 5 stjörnu hótelum.  Virkaði á mig sem alltaf hef verið á tveggja stjörnu hótelum. Ég er of áhrifagjarn. Bókaði mig inn á eitt í París. Nú verður ekki aftur snúið er ég hræddur um. Þetta er annað líf.  En hugmyndirnar um auðlegð í ellinni er fyrir bí. Kannski maður verði ekki svo gamall. En ekki fitna eftirlifandi börnin á óskrifaðri velsæld minni á fimm stjörnu hótelum. Til öryggis ætla ég ekki að lesa Egil eða aðra velferðarbossa framar. Best að halda sig við gamlar hugmyndir um lífið og tilveruna eins og framsóknarmenn gera.

Fjölbreytni í mannlífi einn af höfuðkostum Ölfuss!

Einn af kostum Ölfussins er fjölbreytnin. Hér býr fólk frá tugum þjóðlanda.  Á Þjóðahátíð í Þorlákshöfn á laugardaginn kom í ljós hve menningarleg og félagsleg fjölbreytni er mikil.

Íslendingar frá Thailandi, Filippseyjum, Póllandi, Tékklandi, Pakistan og Danmörku svo nokkrar þjóðir séu nefndar sýndu menningu sína þ.m.t. dansa og matagerðalist. Margir eru búnir að vera hérna í tíu til fimmtán ár aðrir skemur. Gleði skein úr hverju andliti.

 Aðfluttir Íslendingar eru sjálfsagt milli 10 og 15% af íbúum Ölfuss. Í grunnskóla Þorlákshafnar er meiri fjölbreytni en víðast hvar í grunnskólum. Þetta gerir samfélagið eftirsóknarvert til búsetu.

 Þennan mannauð þarf að virkja vel. Tungumálin, verkemenninguna, tengslin.

Reynslan sýnir að það þarf að vinna að því að gagnkvæm aðlögun fólks af ólíkum uppruna gangi vel. Í þeim efnum hvílir mikil skylda á bæði landsstjórn og sveitarstjórnum.  Tryggja þarf umhverfi jafnréttis þar sem allir eru örvaðir til dáða til þáttöku í samfélaginu, þar sem engum er mismunað á grundvelli uppruna, fólk njóti menntunar sinnar og færni og svo framvegis.

 Ölfusið gærti ef það vildi orðið fyrirmyndarsamfélag að þessu leyti.

Í stólinn með Egil Helgason

Fornvinur minn Egill Helgason er eins og prestur í prédikunarstól -hann er með svo virðulegt blogg að samlíking við prédikunarstól er ekki fjarri lagi.   Blogg hans er efst á eyjan.is

Egill hefur rétt fyrir sér. Úr prédikunarstól á ekki að tala um pólitík -alls ekki. það má ekki skilja mig þannig. En enginn prestur kemst hjá því að tala um grundvallaratriði: mannréttindi, umhverfi, lífskjör.

Annars yrði hann að þrástagast á setningunni: Guð er á himnum. Guð er góður.

Mörgum ferst þetta sjálfsagt illa úr hendi eins og Egill bendir á og vaða á súðum um pólitísk málefni. Guðfræðileg umfjöllun um grundvallaratriði er vandasöm.

Hvorki kirkjan né aðrir mega láta stjórnmálamenn ýta sér út úr umræðu um manninn og tilvist hans. Málefnið er of dýrmætt til þessa ð það verði eftirlátið einum hópi manna!

Annars þarf ég að bjóða Agli og geri það hér með að prédika í Strandarkirkju í sumar.  Ég er viss um að hann fer ekki ver með prédikunarumboðið en margur. 

 

Pólitík í kirkju?

Fátt á betur heima í kirkju en umræða um virkjunarmál. Prestar koma oft inn á slík mál í prédikunum sínum vegna þess að margir textar í Biblíunni leiða til vangaveltna um mann og náttúru – um umgengni manns við náttúru. 

Guðfræðilega vegast á tvenns konar sjónarmið. Annarsvegar það guðfræðilega sjónamið að Guð hafi falið manninum ráðsmennsku á jörðinni og honum beri að skila henni í hendur komandi kynslóða í jafngóðu eða betra ástandi en hún var þegar hann tók við henni. Út frá þessu sjónarmiði má gagnrýna virkjunaráform sem hafa mikil óafturkræf áhrif – sem spilla því sem fyrir er –færa það til verri vegar.

 Hins vegar er það guðfræðilega sjónarmið að frumskylda yfirvalda sé að tryggja það að allir hafi til hnífs og skeiðar – hafi trygga lífsafkomu – geti séð fyrir sér og sínum. Með þessum guðfræðilegu rökum má segja að nauðsynlegt sé að maðurinn leggi jörðina undir sig, breyti henni, framkvæmi, stuðli að öflugu atvinnulífi, farsæld þegnanna. 

Flestir eru á því þ.á.m. lútherskir guðfræðingar að kirkjunni beri að  huga bæði að líkamlegri og andlegri velferð manna og þá einnig umhverfi enda samtvinnað í tilveru manna. Hún hefur líka oft barist fyrir rétti hins fátæka og þeirra sem eru órétti beittir í samræmi við boðskap frelsarans.

Á sama tíma reyna stjórnmálamenn alltaf að halda óþægilegri og gagnrýnni kirkju á mottunni og efast um rétt hennar til að hafa skoðun. 

Þeir hafa líka oft töluvert til síns máls. Prestar hafa tilhneigingu til þess að prédika aðeins út frá annarri hliðinni en eins og rökleiðslan hér að ofan sýnir þá má beita guðfræðilegum rökum á ýmsa vegu. Góður prestur útlistar guðfræðilega fleirri en eitt sjónarmið og leiðir sjálfan sig til niðurstöðu með öllum heiðarlegum fyrirvörum. 

Það gildir þó ekki þegar um líf eða dauða er að tefla eða hraklegt óréttlæti.

Laffer -Bogi - Egill -Geir

Flott viðtalið hjá Boga Ágústssyni við Arthur B. Laffer (var að horfa á það í endursýningu). Laffer er frábærlega sannfærandi, skemmtilegur og sjarmerandi. Nú kjósum við þá sem vilja lágan flatan skatt t.d. 15% á einstaklinga og fyrirtæki  (hverjir eru það?) og rífum okkur upp úr kreppunni.  Bogi, Egill og þessir gaurar eiga svo að fá ótakmarkaða heimild til þess að ræða við alvöru menn í veröldinni um efnahagsmál, menningarmál - hvaðeina.  Þátturinn hans Egils er farinn að líða fyrir smæð hinar pólitísku elítu -það sem bjargaði þættinum í dag var maðurinn sem Sjálfstæðisflokkurinn bar gæfu til að setja í leiðtogasætið - virkar öfgalaus, yfirvegarður og skynsamur og viðtalið við hann var eftir því gott.

Og viðtölin hjá Boga eru klassaviðtöl - þetta og viðtalið við norska utnaríkisráðherrann.

Nú má auðvitað segja að við getum horft á viðtöl við erlendar mannvitsbrekkur á erlendum sjónvarpsstöðvum eða lesið bækur eftir þá.  En það er ekki það sama. Íslenskir spyrlar á borð við Boga og Egil, þegar hannn rambar á útlending, setja með spurningum sínum orðræðu þeirra í íslenskt samhengi.  það er svo gagnlegt og opnar ýmis hugskot sem hafa aldrei opnast eða eru búin að vera lokuð lengi.. 

Eitthvað að í ríki Dana!

Það er misráðið hjá dönskum blaðamönnum að birta skopmyndirnar af Múhamed aftur og má hiklaust flokka undir tillitsleysi. Það kjánalega í málinu er að danskir blaðamenn láta glæpóna sem hótuðu að drepa einn teiknarana stjórna sér.  Það er yfirlýst að þeir birtu myndirnar aftur vegna þessara hótana. Maður á ekki að láta glæpona, kjána eða fífl eða annað fólk ef út í það er farið stjórna sér. Það gerðu danskir blaðamenn og hafa kallað með framferði sínu ógnir og hremmingar yfir fjölda fólks sem verður með einum eða öðrum hætti fyrir barðinu á mótmælum og uppþotum sem aftur koma til með að stjórna hugsunargangi danskra blaðamanna. Málfrelsið umtalaða er nákvæmlega það sama fyrir og eftir þessa misráðnu atburði. Það er eitthvað að í ríki Dana núna.  Something.....

Grundvallarspurningar!!

Umræðan á Íslandi er yfirborðsleg. Grundvallarspurningar á borð við það í hvernig þjóðfélagi og í hvernig heimi viljum við búa deyja sé þeim varpað fram. Það virðist vera sátt um óbreytt ástand. Menn eru eins og milli svefns og vöku. Rífist er um einstaka menn, einstakar virkjanir, einstakar ákvarðanir í vaxtamálum.  Hvar er grundavallarumræðan?:  Viljum við meiri jöfnuð? Viljum við alvöru innspýtingu í menntakerfið? Til hvers er menntun? Hvað er háskólamenntun?  Hvar ætlum við að vera eftir 20 ár? Ætlum við að lækna alla eða bara þá ungu? Ætlum við að halda áfram að eiga heimsmet í að samþykkja ekki hælisleitendur? Ætlum við að auka kennslu í mannréttindum og rasisma eða ætlum við að halda áfram að gubba úr úr okkur rasistum?  Ætlum við okkur að lifa í samfélagi sundurlyndis eftir 20 ár?  Hvar eru grundvallarspurningarnar?  Hvar er umræðan um lífsgildin? Ég fullyrði að flestir sjá slíka umræðu aldrei nema í sjónvarpsauglýsingum.

Að undanskildu aðdáunarverðu framtaki Bubba Morthens er fátt gott að gerast. Mikið á sá maður mikið lof skilið fyrir það að efla til samblásturs gegn rasisma.

Við eigum samleið með Evrópu -leiðin liggur til Samfylkingar!

Framsóknarflokkurinn er búinn að vera sagði Magnús vinur minn þar sem hann gekk á undan mér inn gólfið. Ég skal segja þér afhverju hélt hann áfram.  Íraksstríðið og Fjölmiðlamálið fóru með hann. Halldór ætlaði að fara sínu fram með flokkinn en Framsóknarmenn láta ekki teyma sig.  Framsóknarmenn vilja ráða ferðinni og ef foringinn fylgir ekki línunni þá fara þeir –og þeir fóru. Sjálfstæðismenn eru öðruvísi þeir elta foringja sinn. Fylgja honum gegnum þykkt og þunnt.  Þess vegna verða þeir ráðvilltir þegar foringinn bregst eða er ekki nógu ákveðinn, hélt hann áfram.

 Þetta eru kannski skilaboð Magnúsar til Geir Haarde að verða ákveðnari. Mér sýnist ný skoðanakönnun staðfesta það. Samfylkinginn er að sigla framúr.  Burtséð frá skýringu Magnúsar þá virðist Sjálfstæðisflokkurinn standa fyrir flest það sem var og er farinn að gjalda þess.

Samfylkingin er hins vegar flokkur framtíðarinnar sem bæði bankar, fyrirtæki og almenningur veðja á í vaxandi mæli.  Hún gerir sér nefnilega grein fyrir því að við eigum fyrst og fremst samleið með Evrópu.

Tölvukennsluleikur fyrir börn -hver ætlar að þýða?

Evrópuráðið sem Ísland er (fullgildur) aðili að ásamt 46 öðrum Evrópuríkjum hefur gefið út tölvuleik fyrir 7-10 ára börn sem hefur það markmið að kenna börnum á internetið og vara þau við þeim hættum sem þar er að finna. Leikurinn er gefinn út á 13 tungumálum þ.á.m. ensku, þýsku og finnsku en ekki íslensku, dönsku eða norsku. Nú ættu þeir íslensku embættismenn sem eru tengiliðir við Evrópuráðið að semja um að leikurinn ,,Wild Web Woods” verði þýddur á íslensku.  Er sú vinna e.t.v í gangi?

Evrópuráðið er í fararbroddi þeirra sem vinna að því að gera internetið sem öruggast fyrir börn. Evrópuáðið hefur í auknum mæli beint sjónum sínum að réttindum barna –unnið að því að skerpa á réttindum þeirra- og vinna brautargengi sáttmálum sem miða að því að vernda börn og á ég þá einkum við nýlegan sáttmála sem miðar að því  að vernda börn gegn kynferðislegri misnotkun.

En hver ætlar að þýða tölvuleikinn?  Þetta er gagnlegur og skemmtilegur leikur. Við hér á heimilinu munum notast við hann á ensku þangað til hann kemur á íslensku. Íslendingar þurfa að læra ensku hvort sem er – en auðvitað þyrfti hann að koma á því ástkæra ylhýra.

Slóðin að leiknum og ýmsu öðru er www.coe.int/children

Af baráttu gegn kynþáttafordómum, útlendingafælni og öðru slíku.

ECRI, evrópunefndin gegn kynþáttafordómum eins og hún hefur verið kölluð hér, gefur í dag út skýrslur um Andorra, Lettland, Holland og Úkraínu.  ECRI andæfir gegn kynþáttaforrdómum, útlendingafælni, gyðingaandúð og slíku og allri mismunun sem af ofangreindu kann að stafa.  ECRI er sjálfstæð sérfræðinganefnd á vettvangi Evrópuráðsins og skýrslur hennar eru stimplaðar ef svo má segja af ráðherranefnd Evrópuráðsins þar sem utanríkisráðherrar aðildarríkjanna 46 eða staðgenglar þeirra sitja. Skýrslurnar ættu að vera fróðlegar fyrir blaðamenn og þá sem fást við löggjafarstörf hér á landi og aðra þá sem eru í stöðu til og hafa áhuga á að þróa löggjöf og  móta aðferðir í að móta hér gott samfélag þar sem saman kemur fólk úr ólíkum áttum. 

Andorra er m.a. gagnrýnt fyrir það að hafa ekki staðfest viðauka nr. 12 við mannréttindasáttmála Evrópu sem bannar alla mismunun í samfélagi vegan uppruna, trúar, litarháttar o.s.frv. Andorra hefur nýlega bannað hatursræður og samtök kynþáttahatara hvers konar.

Í vinnulöggjöf sinni hefur Lettland lagt blátt bann við hvers konar mismunun og stjórnvöld þar  hafa reynt að fjölga þeim sem fá lettneskan ríkisborgararétt og hafa engan fyrir en svo er um fjölmarga Rússa.

Í Hollandi hefur tónninn í umræðunni um útlendinga og minnihlutahópa hríðversnað má segja allt síðan Theo van Gogh var skotinn.  Hollendingar eru að setja upp stöðvar vítt og
breytt um land sitt til þess að aðstoða aðstoða fórnarlömb kynþáttaofsókna en þeim hefur í stíl við umræðuna farið mjög fjölgandi.

Í Úkraínu eru þeir með fyrirbæri sem heitir Committee for Nationalities and Religion og hefur á sinni könnu baráttu gegn kynþáttafordómum og kynþáttamismunun.  Refsilöggjöfin gegn glæpum þar sem kynþáttafordómar eru undirliggjandi hefur verið hert.  Menn hafa verið lögsóttir vegna yfirlýsinga sem fela í sér gyðingaandúð en hún er nokkuð áberandi þar og einnig fyrir útgáfu bóka og rita sem fela í sér gyðingaandúð. Þá er í skýrslunni fjallað um bág efnaleg og félagsleg kjör Roma fólksins en hlutskipti þess fólks víða í Úkraínu  er satt að segja fyrir neðan allar hellur. Undirritaður hefur skoðað aðstæður Roma í Ukraínu og var satt að segja brugðið.

Ég er ekki frá því að íslendingar þurfi að fara að endurskoða sína löggjöf og kannski ekki síður að taka kynþáttahatur föstum tökum í grunnskólanum. Hér virðast hafa vaxið upp kynslóðir þar sem mjög stutt er í kynþáttahatur og útlendingahatur og umburðarlyndi gegn öðrum hópum er ekki í lagi.  Það þarf að kenna mannréttindi í grunnskólanum, kenna fólki að hafa álit á einstaklingum en ekki hópum manna eftir uppruna þeirra, trú, litarhætti eða öðru álíka.

Slóðin á ECRI er http://www.coe.int/ecri. og linkur á þessa tilteknu fréttatikynningu er https://wcd.coe.int/ViewDoc.jsp?id=1247551&Site=DC&BackColorInternet=F5CA75&BackColorIntranet=F5CA75&BackColorLogged=A9BACE