Atvinnuleysi í Ölfusinu?!

Einhvers staðar sá ég að 80 manns væru á atvinnuleysisskrá í Ölfusi, já það var á INN sjónvarpsstöð þar sem þau voru að deila um Bitruvirkjun í þætti Óla á Hrauni bæjarstjórarnir í Ölfusi og í Hveragerði og líka spá í það hver yrði formaður Flokksins.  Ólafur Áki nefndi það að um 80 manns væru atvinnulausir í Ölfusi. Nú er það svo að atvinnuleysi er alvarlegt mál og vonandi tekst okkur að finna vinnu fyrir alla sem fyrst.

Árið 2002 var atvinnuleysi í Ölfusi. Þá komum við upp í Þorlákskirkju athvarfi fyrir atvinnulausa.  Fólk kom á morgnana, fimm, sex manneskjur stundum, lásu Moggann og Fréttablaðið, drukku kaffi, átu vínarbrauð úr bakaríi Más bakara og Önnu sem nú eru búin að selja bakaríið til Gríms bakara, frænda Benna heitins Thor., og spjallaði við hvert annað og prestinn.  Einhvern tímann kom maður og miðlaði fróðleik um ástand og horfur. Svo hætti fólk að koma – ástandið lagaðist- presturinn var aftur einn með vínarbrauðin sín.

Er áhugi fyrir því að þetta verði endurtekið? Eigum við að opna athvarf lesa Moggann og éta saman vínarbrauð? Er atvinnuleysi farið að hrjá fólk hér í Ölfusi eða er þetta lítið meira en hefðbundið atvinnuleysi ennþá? Ég vil endilega að fólk hafi um þetta samband. Maður á víst ekki að loka sig af sé manni hent heim. Ég þekki þetta reyndar sjálfur, einu sinni var mér hent heim og fór ferlega illa með sjálfsálitið.  Hafið endilega samband við prestinn eða prestinn í Hveragerði ef menn búa í Ölfusinu fyrir ofan Þurá. Þeir sem vita um einstaklinga sem eru að koðna niður af þessum sökum láti vita – í ágætu hófi á maður að skipta sér af náunganum.  Sími minn er 8980971 og netfangið [e-mail]

Athugasemdir

[Jón Ólafur Vilhjálmsson, 4.2.2009 kl. 18:25]

Þetta er frábært framtak hjá þér Baldur einnig vil ég benda vinum og vandmönnum þeirra sem atvinnulausir eru að hafa reglulega samband hitast oftar ræða saman málin og styðja þannig móralskt þá einstaklinga það er ótrúlega áhrifa ríkt að efla vináttuna og samkennd þegar erfiðleikar steðja að  að eiga vini í raun er ómetanlegt, það kostar okkur sem erum í fullri vinnu ekkert en gefur okkur mikið að hjálpa á allan þann hátt sem við getum.