Geir og Gordon - ótrúlega margt líkt með þeim!

Ótrúlega margt sameiginlegt eiga þeir forsætisráðherrarnir Gordon Brown og Geir Haarde. Þeir eru jafnaldrar og tóku við á svipuðum tíma af  ógnarsterkum leiðtogum sem mótuðu heilt tímabil.  Þeim var báðum afhent embættið en unnu það ekki í kosningum.  Við þá voru bundnar miklar vonir.  Þeir voru mjög vinsælir í byrjun en hafa báðir rennt sér niður vinsældarlistann.  Þeir höfðu báðir verið fjármálaráðherrar í tæpan áratug. Bæði hér og þar voru menn búnir að fá nóg af forverum þeirra.  Staða Brown er að því leyti sterkari en Geirs að hann losaði sig við forvera sinn til Miðausturlanda.

Báðir eiga við efnahagsörðugleika að stríða í löndum sínum.  Báðir eru vel menntaðir. Geir í hagfræði í Bandaríkjunum.  Gordon er með Phd í sögu eða heimspeki frá Edinborgarháskóla.  Báðir fást við þann vanda að flokkar þeirra hafa verið lengi við stjórnvölinn. Hvorugur flokkanna hefur fengið tækifæri til þess nýlega að endurnýja hugmyndafræði sína og sleikja sár sín í stjórnarandstöðu. Breski Verkamannaflokkurinn vegna kosningakerfisins.  Sjálfstæðisflokkurinn vegna þess að hann getur eftir hverjar kosningar valið úr samstarfsaðilum.

Báðir sitja þeir samfélög sem eru á miklu mótunarskeiði. Þrátt fyrir andstreymi sem þeir mæta nú er spá mín sú að hvorugur þeirra hafi sagt sitt síðasta. 

 

Íslensk bílamenning færði kirkjurnar úr alfaraleið.......

Það eru margir fallegir bæir á Íslandi til dæmis Seyðisfjörður Ísafjörður og Akureyri eins og Jón Valur vinur minn bendir á í athugasemdum.  Seyðisfjörður stendur einmitt í botni djúps fjarðar og byggist upp eðlilega. Fyrst kriki í kringum höfnina, síðan læðist byggðin eftir malarkömbum síðan byggja menn þar fyrir aftan, húsin snúa að höfninni, standa gjarnan í sveig.  Aðalgatan er svo gjarnan nefnd Hafnargata og ef bratti er í landslaginu má örugglega finna Brekkustíg fljótlega. Á 20. öldinni ofanverðri fara menn svo að byggja hverfi án nokkurrar tengingar við miðpunkt.  Þó ekki á Seyðisfirði.  Sjarminn fellur.

Í Evrópu var dómkirkjan miðpunkturinn og oft dómhúsið á móti. Víða er þetta svo hér en íslensk bílamenning færði kirkjurnar víða útfyrir og þær urðu tákn bæjarins en duttu úr alfaraleið gangandi manna.

Landlag setur þessi auðvitað skorður. Víða á Vestfjörðum er bæjunum komið fyrir á þríhyrningseyri sem takmarkar vöxt þeirra og viðgang. Annars staðar eru fjöllin það brött að bærinn veður ræma fyrir ofan fjöruborðið.  þetta má sjá víða á Austjörðum. Svo eru það bæirnir sem byggjast við brúarsporði eins og Selfoss og teygja sig svo eftri þjóðveginum í báðar áttir eftir því sem sjoppunum og búðunum fjölgar.  Enn aðrir byggjast upp í kringum þjóðveginn sem liggur niður að höfninni eins og þeir tveir bæir sem mér þykir einna vænst um Höfn í Hornafirði og Boston í Bandaríkjunum. þetta er auðvelt að sjá á Höfn en kunnuleg augu þarf til að sjá í stórborginni.

 

Hafnarfjörður er líka fallegur!

Sennilega er Hafnarfjörður næst fallegast bær á Íslandi á eftir Hveragerði.  það er einkum út af bæjarstæðinu, bærinn byggður í slakka utanum fjörð, ekki bara einhvern veginn upp í landið eins og t.d. Þorlákshöfn, Akranes eða Kópavogur.  Staðir sem byggjast eðlilega upp, smátt og smátt t.d. í kringum höfn verða svo fallegir og eðlilegir.  Ég nefni Osló og Hafnarfjörð og bæina í Færeyjum, Vestmanna t.d. Allt of fáir íslenskir staðir standa fyrir botni fjarða.  Standa yfirleitt utarlega eða fyrir miðju og þá öðru megin fjarðar byggðir upp með það í huga að stutt væri á miðin.

Hitt er annað að frá Höfn í Hornarfirði er óviðjafnanlegt útsýni og bærinn er fallega byggður upp frá höfninni. Reynar er öll ræman sunnan undir Vatnajökli frá Skaftafelli undri líkust. Saurbær í Dalasýslu er líka ótrúlega falleg sveit og það umhverfi allt í grennd við Gilsfjörðinn.

Er Hveragerði fallegasti bær á Íslandi?

Alveg sérstakur bær Hveragerði.  Gróðursældin með ólíkindum. Snemma hneigðist þangað garðyrkjusamt fólk sem breytti Hveragerði í Edenslund með garðyrkjustarfi sínu og skógræktarstarfi.  Blíðan undir björgunum og suðan í jarðskorpunni gerðu útslagið. Fyrir vikið er Hveragerði hlýlegur bær og fallegur. Ekki hægt að finna samjöfnuð nokkursstaðar innanlands.  Og sundlaugin í Laugaskarði er sérstök. Þægilegan gróðurilm leggur fyrir vit manns úr heitu pottunum.  Þú gleymir stund og stað en manst þó hvar þú ert því laugin og umhverfi hennar er engri annarri lík.

Beðist afsökunar á hroðvirknislegri skilgreiningu á Framsóknarflokknum!

Það kemur að daginn að nokkrir háttsettir Framsóknarmenn lesa bloggið mitt og ég hef í símtölum verið harðlega ganrýndur fyrir að kalla Framsóknarflokkinn ,,afturhaldssaman bændaflokk". Þetta er hér með dregið til baka.  Nær hefði verið að tala um framfarasinnaðan nútímaflokk með áberandi í haldssömum og afturhaldssömum elementum innanborðs.  Eins mætti tala um fyrrverandi meginflokk og sýna með því orðavali faglegt hlutleysi.

þetta brotthvarf Framsóknarflokksins sem meginflokks er ekki með öllu gott fyrir íslenska þjóð.  Hún hefði alveg átt skilið að njóta Guðna Ágústssonar sem forsætisráðherra og sú tíð gæti enn komið þó ekki sé það nú trúlegt.  Guðni er eins höggvinn út úr íslensku úr íslensku hamrabergi, stendur djúpum fótum í íslenskri mold, er skynsamur í betra lagi og þó hann horfi mikið inn til dala þá á hann það til að horfa til sjávar einnig yfir höf og lönd og Evrópu. En auðvitað skiptir máli hvort að sitja hvítir hrafnar eða svartir á öxlum hans.

 Jónas frá Hriflu átti mikinn þátt í að stofna bæðir Alþýðuflokk og Framsóknarflokk.  Alþýðuflokkurinn skyldi vera fyrir verkafólk í bæjum.  Framsóknarflokkurinn fyrir bændur og búalið.  það fór svo að flestir fluttu í bæinn. það er því  í samræmi við sýn Jónasar að Alþýðuflokkurinn dafni(undir nafninu Samfylking) og Framsóknarflokkurinn leggi upp laupana að mestu.

Að misnota sakleysi fiskanna!

Fiskar geta lært, segja vísindamenn og nýjustu fréttir eru  að hægt sé að kenna þeim að hlýða vissum hljóðum.  Þannig er hægt að búa til forystufiska sem leiða hópinn í gildru.

Þetta er það sem forystumönnum hefur tekist fyrirhafnarlítið. 

Annars finnst mér þetta siðleysi með fiskana. Getum við ekki bara veitt þá eins og fyrr. Uggi litli kemur hróðugur til pabba og mömmu. Vitiði ég á að verða forystufiskur. Ég get lært hljóð. Ég á að leiða hópinn. Fyrr en varir er hann búinn að leiða foreldra sína og allan ættstofninn í gildru. Mennirnir nota sér sakleysi unga fisksins.  Búa til svikara. Er allt leyfilegt?

Flokkar sem ekki fá hvíld......!

Það er óhætt að taka ofan fyrir Valgerði Sverrisdóttur sem var hædd og hrakyrt þegar hún setti það fram fyrir þremur árum að hugsanlega gætum við tekið upp evru án þess að ganga í ESB.  Nú tekur Björn Bjarnason þessa hugmynd upp sem eins konar varnarbolta og allir góla af hrifningu.  Málið er hins vegar að flokkur Valgerðar bakkaði hana ekki upp. Valgerður á ekkert heima í afturhaldssömum bændaflokki.  Hún á heima í Samfylkingunni.  Sjálfstæðisflokkurinn er farinn að þvælast ótrúlega mikið fyrir í íslensku samfélagi.  Hann er staðnaður í hugmyndum níunda og tíunda áratugar síðustu aldar.  Honum var ekkert síður nauðsyn á því en Framsóknarflokki að fá að endurnýja sig í stjórnarandstöðu. Flokkar sem fá ekki hvíld eiga það til að hrynja saman gagnvart nýjum viðfangsefnum sem þeir eru vanbúnir að takast á við.

Glæsilegt hjá Íslendingum!

Þriðji hver Íslendingur, einn þriðji landsmanna, telur að aukna tíðni afbrota megi rekja til vaxandi fjölda útlendinga á Íslandi.  Svo kemur í ljós að afbrot hafa dregist saman um þriðjung  síðan 2004 og síðan hefur orðið gífurleg fjölgun fólks hér á Íslandi sem fætt er annarsstaðar.  Með vaxandi fjölda útlendinga  fækkar afbrotum. Hverjum er það að þakka?

það kemur á daginn að sami útlendingaóttinn hefur stungið sér niður hér og víða annarsstaðar.  Á sama tíma og menn sanka að sér fólki fá öðrum löndum til þess að vinna erfiðustu störfin og vera á lægsta kaupinu reyna menn að kenna því um það sem aflaga fer. 

Glæsilegt hjá Íslendingum. 

Að líta til yfirvalda eða líta í eigin barm!

Barak Obama hvetur þeldökka Bandaríkjamenn að huga meira að fjölskyldugildum og ala börnin sínm betur upp og þá  í faðmi fjölskyldunnar. Hann talar inn heim skilnaða, afbrota, fíkniefnaneyslu þar sem svartir toppa hvíta í öllum prósentutölum. Lítið ekki bara til yfirvalda, segir hann.  Þetta ástand er ekki bara vegna ranglátra laga, löggæslu, misréttis eða fordóma. Lítið í eigin barm.  Hluti af sökinni leggur þar.  Við gerum ekki nógu miklar kröfur til okkar sjálfra.

Jesse Jacksson er af  þeirri kynslóð sem staðnæmdist við það að gera kröfur til yfirvalda um betri og réttlátari umgjörð Afríkönskum Ameríkumönnum til handa.  Vandi þeirra stafaði af árhundruða misrétti og fordómum sem endurspeglaðist í samfélagsgerðinni eins og hún er: Stofananarasisma.  Honum finnst Obama tala niður til bræðra sinna og systra með því að biðja þau um að beina athyglinni að sjálfum sér.

Þess  vegna vill hann helst skera undan Obama eða gelda hann en þessi ummæli sluppu út í ljósvakann og hafa verið spiluð þúsund sinnum. Reverend Jesse Jacksson er lagt það til málsbóta að hann hafi þarna notað myndlíkingu. (Bókstafstrúarmenn mættu huga að því).

En við gætum tekið skilaboð Obama til okkar.  Erum við ekki að missa inn á völl fullorðinsáranna allt of mikið af óuppöldu fólki? (Horfiðið bara á fótboltaleik. Það er þrasað og rifist í dómurunum út í eitt).

Hvers vegna Evrópusambandið!

Við eigum hiklaust menningarlega og sögulega séð heima með þjóðum Evrópu.

Með ESB aðild verðum við hluti af samstarfi og samvinnu Evrópuþjóða. Það þjónar best efnahagslegum hagsmunum okkar og einnig öryggishagsmunum okkar.  Eins og nú er erum við eins og aflvana bátur í togi.

Með aðild opnast ekki bara (alveg) 500 miljóna manna markaður innan Evrópu.  Aðild opnar einnig aðgang að öðrum markaðssvæðum í veröldinni.

Undanfarna áratugi hafa flest réttindi neytenda og launafólks komið til okkar frá Evrópusamfélaginu.

ESB aðild yrði myndi hiklaust styrkja dreifðar byggðir okkar og þar með landbúnað.

Við yrðum sjálfstæð þjóð í bandalagi sjálfstæðra þjóða.

Við eigum strax að lýsa því yfir að markmið okkar sé aðild að Evrópusambandinu.