Safamýrarpiltarnir"

Enn höldum við Spursarar áfram að hlaða að okkur leikmönnum.  Sumrin eru okkar uppáhaldstími þá kaupum við hvern stjörnuleikmanninn á fætur öðrum. Svo kemur veturinn.  Eftir hinn stórkostlegu innkaup sumarsins kemur vetur vonbrigðanna.

Og við Frammarar erum komnir í gamla farið, töpum fyrir KR og töpum fyrir Val.  Seljum frá okkur úrvalsmenn til keppinautanna á miðju tímabili. Við þurfum að fá betri hugsuði stjórn Fram (sjálfsagt eru þetta nú ágætis menn).  Um Val leikur helgiljómi séra Friðriks. KR er alltaf gamla vesturbæjarstórveldið en hvað erum við: ,,piltarnir úr Safamýrinni". Það vantar allt sjálfstraust í þá sem gegna því heiti. það vantar helgisögn. það vantar upphafna sögu. Við þurfum að gera hetjum okkar skil. Við þurfum að upphefja sögu okkar.

Garcia á leið til Tottenham

Ömurlegur heimur og úreltar alþjóðastofnanir!

Hlutskipti flóttamanna í veröldinni er ömurlegt. Miljónum saman er fólk árum saman í flóttamannabúðum deyjandi úr næringaskorti, kulda og óþrifnaði.  Á fermílu eftir fermílu eru fátækrahverfin í kringum stórborgirnar í Asíu og Afríku, drulla,klastur, sóðaskapur, fátækt, örbirgð, vonleysi.  Hundruðum þúsundum saman bíða flóttamenn sem hafa náð til ríkra landa í móttökustöðvum og bíða þess jafnvel árum saman að vera sendir til baka.  Oftast mega þeir vinna en fá hvergi vinnu, stundum mega börnin fara í skóla en það er langt í skólann. Þúsundum saman er fólk myrt í Darfur, karlmenn, konur og börn.  Áratugum saman lifa íbúar Palestínu við stríðsástand, frelsisskerðingu og skort.  Meðan þetta gerist eru valdastofnanir heimsins  úreltar því þær endurspegla gamlan heim.  Alþjóðabankinn er hættur að virka Öryggisráð sameinuðu Þjóðanna þar sem gömlu heimsveldin Bandaríkin, Rússland, Bretland og Frakkland ráða öllu er áhrifalítið.  Við upphaf 21. aldarinnar sitjum við uppi með heim þar sem fólk þjáist, þar sem börn í tugmiljónatali eru ekki boðin velkomin og alþjóðastofnanir, sem komið var á við lok seinni heimstyrjaldarinnar, og eiga ekki við í nýjum heimi.

Af McCain og Barak Obama

McCain er húmoristi. Upp úr honum velta vafasamir brandarar og konan og aðstoðarmennirnir þurfa sífellt að pikka í hann.  Hann ræður ekki við sig.  Spennandi karl.  Svona var Geir Haarde áður en hann varð alvarlegur og pirraður.  Barak Obama er eins og vindhani.  Lagður af stað inn á miðjuna.  Hættur við að fara út úr Írak.  Er að fæla frá sér hugsjónamennina og þar með stemninguna.  Liggur við að maður sé farinn að sakna Hillary.

Þórbergssafnið á Hala!

Kom í Þórbergssafnið á Hala í Suðursveit. Frábært safn um líf og ritstörf meistara Þórbergs. Safnið er mátulega stórt -  svona hálftíma safn -  og hægt að fá sér kaffi eða hvítvín á eftir.  Viðmót starfsfólks ágætt.  Aðgangseyri stillt í hóf og fróðlegur bæklingur fylgdi.  Myndarlega að öllu staðið.  Þórbergur varð minn gúru strax í menntaskóla ásamt Halldóri. Það tók mig svo allt of langan tíma að sleppa frá þeim, en það er önnur saga.

Átján rétta málsverður!

Yfir átján rétta málsverði ræða leiðtogar heimsins fæðuskort í veröldinni. http://www.huffingtonpost.com/

Strandarkirkja í Selvogi -mesta áheitakirkja á Íslandi.

Strandarkirkja í Selvogi er opin gestum og gangandi allt sumarið, jafnt þeim sem koma á einkabílum, reiðhjólum, hestum, tveimur jafnfljótum eða bara rútubílum. Ekki er rukkað neitt fyrir fólk í rútum. Allt sumarið steymir fólk til að skoða þessa fallegu kirkju sem er mesta áheitakirkja á Íslandi.  Sennilega byggð af sjófarendum sem komust, hugðu þeir, fyrir kraftaverk lífs af. Örvæntingarfullir, ráðþrota höfðu þeir heitið því að byggja kirkju þar sem þeir næðu landi. Þessi kirkja hefur alltaf verið kirkja vonarinnar, skjól almúgans, helgistaður við úfna suðurströndina.  Stundum ætluðu yfirvöld að flytja hana í huggulegra umhverfi en aldrei varð þeim kápan úr því klæðinu. Þeir sem hugðust ganga þannig gegn vilja fólksins misstu alltaf embætti sín.  Þannig á það líka að vera.

Ekkert kostar að koma í kirkjuna en margir nota tækifærið og heita á kirkjuna. Sumir nota tækifærið og pissa í ágætu klósettjarðhýsi sem byggt var fyrir áheitafé.  Margir fá sér síðan kaffi hjá henni Sigrfíði í T-bæ eða fá sér pylsu hjá henni Guðrúnu í Götu eða listmun hjá Sigurbjörgu í Þorkelsgerði.

Umhverfi kirkjunnar er allt til fyrirmyndar og sér staðarhaldarinn Sylvía Ágústsdóttir í Götu um þá hlið mála.

Samkynhneigð pör velkomin!

Skoðanakönnun 24 stunda um hvort að prestar myndu staðfesta samvist samkynhneigðs pars ef eftir því yrði leitað var skemmtileg og þörf og blaðinu til sóma. Þar kom fram það sem maður vissi að aðeins örfáir prestar, níu stykki,  myndu neita samkynhneigðu pari um slíka þjónustu en yfirgnæfandi meirihluti myndi gera það.  Nokkrir eðlilega óákveðnir. Ég veit ekki hvort fólk áttar sig á því en íslenska þjóðkirkjan er á undan flestum öðrum kirkjum í veröldinni að þessu leyti.  Aðrar kirkjur eru að klofna út af því hvort að biskupar eða prestar megi vera samkynhneigðir.  Enginn lyftir augabrún út af slíku hér.  Hér hafa prestar verið opinskátt samkynhneigðir án þess að nokkur gerði rellu út af því, ekki ein einasta kelling, ekki einn einast kall.

Ég spái því að fólk muni tala um giftingu og hjónavígslu hjá samkynhneigðum pörum jafnt og gagnkynhneigðum og sá munur sem er á athöfnum eftir kynhneigð þurrkist út með tímanum.

Og samkynhneigð pör eru að sjálfsögðu velkomin í þær kirkjur sem ég hef eitthvað að segja um.

Sunnudagshugvekjan: Er til kristið sjónarmið í máli Ramses og Rosemary?

Hvað myndi hið kristna sjónarmið vera í máli Paul Ramses sem vísað var til Ítalíu og Rosemary konu hans sem vísað verður til Svíþjóðar ásamt barni þeirra?  Samúðin með þeim sem er í vanda staddur ætti að vega ansi þungt. (Í gamla testamenntinu er það margbrýnt fyrir okkur að taka vel á móti útlendingum). Leiða má líkur að því að líf mannsins gæti verið í hættu. Það ætti að skipta verulegu máli. Hagur barnsins ætti að vega ansi þungt. Mér finnst of lítið tillit tekið til barna yfirleitt þegar fjallað er um hælisleitendur. Hið kristna sjónarmið væri hiklaust að reyna að bregðast við með þeim hætti að fjölskyldan gæti haldið saman. Þáttaka mannsins í hjálparstarfi í Kenya ætti að skipta máli. En við skulum einnig hafa það í huga að kristnir menn hafa löngum lagt blessum sína yfir það að reglur og lög væru nauðsynleg og ekki mætti láta hjartagæskuna hlaupa með sig í gönur. Viðurkennt er að furstinn, keisarinn (eða dómsmálaráðherrann) verði að halda uppi aga, festu og skikki í einu samfélagi til þess að mannlíf þar geti gengið bærilega fyrir sig og kærleikur sá sem Kristur boðaði fái notið sín. Tala má um nauðsyn þess að koma í veg fyrir óreiðu(kaos) með því að tryggja heildarreglu(kosmos).

Svo verður hver að meta fyrir sig hvað vegur þyngst í þessum efnum. Sjálfum finnst mér að hagur og réttur barnsins mætti vera í meiri miðpunkti í umræðunni.  Börn eiga sinn rétt.  Til eru sáttmálar um réttindi barna. Mér finnst of mikið gert úr fordæmisgildinu. Þetta mál er svo sérstakt á marga lund að það verður aldrei að beinu fordæmi fyrir önnur mál og hvað gerði það svo sem til þó að þeim fjölgaði eitthvað sem fengju hér hæli?

Síðan finnst mér þögn þjóðkirkjunnar og þjóna hennar athyglisverð.  Það er ekki nema röskur áratugur síðan að íslenska þjóðkirkjan tók þátt í því að fela flóttamann í kirkju.  Er allur vindur farinn úr kirkjunni? Það ætti að vera hlutverk kirkjunnar að halda uppi tilteknum sjónarmiðum.  Ekki endilega að taka afstöðu en að halda til haga eins og sagt er ákveðnum röksemdum og sjónarmiðum.

Mál Paul Ramses! Börn eiga líka sinn rétt!

,,Rosemary með dvalarleyfi í Svíþjóð sem gildir til ársins 2012, en það veitir henni ekki rétt til dvalar á Íslandi. Hún sótti um dvalar- og atvinnuleyfi á Íslandi á árinu 2007 en var synjað"

Sýnir með öðru hvað tilvera þeirra sem neyðast til að flýja heimaslóðir er erfið.  Fólk fær oft dvalarleyfi árum saman en þarf fyrir vikið að lifa lífi með takmörkuðum réttindum.  Af hverju var henni svo synjað um dvalarleyfi á Íslandi?

Í þessu máli finnst mér gleymast að horfa til hagsmuna barnsins. Hefði ekki mátt ,,sveigja" reglur vegna barnasáttmála Sameinuðu Þjóðanna?  Hann kveður á um það að börn eigi rétt á að njóta beggja foreldra sinna. Það er ljóst að einhver stjórnvöld þurfa að skera á hnútinn. (Eigum við að treysta því að Berlusconi hafi stærra hjarta en við?)

Í þessu máli var kjörið tækifæri til að sýna mannúð í verki. Þetta mál var einnig kjörið tækifæri til þess að losna undan þeirri tölfræði að Ísland hafi veitt einum manni pólitískt hæli. Það er víða hæðst að Íslandi vegna þeirrar tölu.

Útlendingastofnun: Ramses var ekki handtekinn á heimili sínu

Jóns Ólafssonar á Kirkjulæk minnst!

Hún var falleg Fljótshlíðin í gær en þangað fór ég til að fylgja frænda mínum fjarskyldum og kunningja Jóni Ólafssyni á Kirkjulæk í Fljótshlíð.  Jón lést aðeins 53ja ára gamall eftir erfið veikindi.

 Að Breiðabólstaðarkirkju dreif að fólk hvaðanæfa. Jón var vinsæll af sveitungum og öðrum sunnlendingum enda manninum margt til lista lagt, kvæðamaður, hagyrðingur, söngmaður, húmoristi, hleðslumaður, smiður, ættjarðarvinur. Óvenju hæfileikaríkur maður  Jón Ólafsson frá Kirkjulæk og greinilegt var að fráfall hans snart marga djúpt. Sennilega hafa verið um 800 manns við jarðarförina. Fólk sat í bílum sínum og hlýddi á sálmasöng og ágæta ræðu Hjálmars Jónssonar og þegar dró að lokum athafnar stigu menn úr bílum sínum og söfnuðust saman fyrir utan kirkjuna.  Það var fallegt og eftirminnilegt að sjá.  Veðrið lék við syrgjendur og í hlíðinni fyrir ofan léku sér hestar, fuglarnir sungu.  Karlakór Rangæinga stóð heiðursvörð. 

Fljótshlíðin er fjölmenningarlegt samfélag. Innan um bændur og búalið þjóðþekkt andlit stjórnmálamanna og fjármálajöfra.  Jón hafði það sterka nærveru og var það hlýr maður að hann tengdist öllum sem hann umgengst og greinilegt var að allir vildu honum fylgja.  Með honum er góður og eftirminnilegur maður genginn.

Eftir stendur kaffi Langbrók sem hann rak ásamt fjölskyldu sinni og Meyjarhofið sem hann reisti og var vígt fyrir rösku ári.  Meyjarhofið verða menn bara að koma og skoða.  Það er og verður minnisvarði um frábæran mann.