Hálft skref knattspyrnuforystunnar gegn kynþáttafordómum!

Yfirlýsing gegn fordómum er fínt hálft skref tekið hjá knattspyrnuforystunni og í samhengi við það sem er að gerast á meginlandi Evrópu en Samtök knattspyrnumanna í Evrópu eru að hrinda af stað herferð gegn kynþáttafordómum í og í kringum knattspyrnu og tilefnið er Evrópukeppnin í sumar.  þessi herferð er í samvinnu við Evrópuráðið í Strassborg.  Knattspyrnuforystan í Evrópu hefur m.a. notið sérfræðiráðgjafar Evrópunefndarinnar gegn kynþáttafordómum og hefur undirritaður komið að þeim málum sem sérfræðingur tilnefndur af Íslands hálfu í nefndinni.

Mér sýnist svona í fljótu bragði að í yfirlýsingu fyrirliðanna hefði mátt tala beint um kynþáttafordóma eins og talsmaður þeirra Gunnlaugur Jónsson gerði á blaðamannafundinum en ekki aðeins ,,hvers kyns fordóma og dónaskap sem rýrir álit á íþróttinni" eins og segir í textanum.  það er óþarfi að útþynna baráttuna gegn kynþáttafordómum eða skirrast við að taka sér það orð í munn. Kynþáttafordómar eru ekki eins og hver annar dónaskapur. Svo á það ekki að vera í forgrunni hvort það rýrir álit á íþróttinni eða ekki.  Það á að vera í forgrunni að kynþáttafordómar eru eitur í mannlegu samfélagi þ.m.t. knattspyrnusamfélaginu.

Tek samt ofan fyrir knattspyrnuforystunni.  Svo er heil umferð í sumar sérstaklega tileinkuð baráttunni gegn kynþáttafordómum. Ég hvet forsvarsmenn liða og leikmenn að setja ekki tappann í betra eyrað þegar leikmenn eða  áhorfendur fara að atyrða menn með tilvísun til uppruna þeirra eða litarháttar eða annars slíks. Kynþáttafordómar mega ekki skjóta frekari rótum í íslensku samfélagi .

Knattspyrnumenn á Íslandi vilja fótbolta án fordóma

Evrópuráðið: Svíar taka við formennskunni!

Svíar hafa tekið við formennsku í ráðherranefnd Evrópuráðsins.  Carl Bildt utanríkisráðherra Svíþjóðar tekur við af Ján Kubis utanríkisráðherra Slóvakíu. Hvert aðildarríki, en þau eru 47, tekur að sér formennskuna í hálft ár í senn. Svíar halda henni fram í miðjan nóvember en þá taka Spánverkjar við. Halldór Ásgrímsson var formaður ráðherraráðsins um aldamótin síðustu sem utanríkisráðherra Íslands.

Svíar einsetja sér í formannstíð sinni að leggja áherslu á að mannréttindasáttmáli Evrópu verði virkur í aðildaríkjum Evrópuráðsins. Þeir ætla sér að vinna kerfisbundið að framgangi mannréttinda, vinna að auknum réttindum barna og leggja áherslu á að réttindi fatlaðra verði virt.

Svíar eru þekktir fyrir það að láta hendur standa fram úr ermum þegar kemur að mannréttindum. Íslendingar gætu margt af þeim lært í þeim efnum.

Kaldhæðnislegir aulabrandarar!

Ég lenti í því að vera lagður inn á Landsspítalann í tvo daga sem er nú ekki í frásögu færandi. Hjá mér var þetta jákvæð reynsla. Það var skemmtilegt að liggja á stofu með þremur öðrum.  Vakna upp við brandara, kaldhæðni og leggja sjálfur til slíkt.  Kynnast lífsferli bláókunnugra manna.  Láta koma fram við sig eins og prins.  Fá athygli og mat í rúmið.

Það vantar tilbreytingu í daglegt líf.  Maður vaknar upp á hverjum þeim morgni sem guð gefur með sömu manneskjunni og sama krakkastóðinu.  Á ferðlögum –einn á tilbreytingasnauðu tveggja stjörnu hótelinu.

Vonandi verður ,,tilbreyting” manns ekki fólgin í tíðum ferðum á Landsspítalann svo sem er hlutskipti margra og þeir hinir sömu eru auðvitað beðnir afsökunar á svona léttúðlegum skrifum.

Hins vegar gæti ég breytt um.  Gengið í norska herinn eða farið í vegavinnu og vaknað þá upp í vegavinnuskúrum eða hermannaskýlum. Á slíkum stöðum vakna menn upp við kaldhæðnislega aulabrandara.

Meira um vináttuna!

Skilgreining á vináttu sem allir gætu verið sammála um finnst varla.  En finna má ákveðna þætti sem allir þeir sem hafa ritað um vináttu eru sammála um.  Sumir þætir eru án vafa menningarlega bundnir.  Vinátta er einnig meira metin í sumum samfélögum en öðrum.  Sums staðar er vinátta hluti af samfélagsgerðinni. Meira og minna viðurkennd bandalög sem byggja á vináttu verða til og vettvangur þeirra er þar sem valdið liggur. Vinátta við valdsmannanninn leiðir sums staðar til áhrifa og jafnvel embætta.

Ætlun mín er ekki að fjalla um nútímaviðburði á Íslandi í tengslum við vináttuhugtakið. Slíkt gæti þó verið allrar athygli vert.  Nei, ætlun mín er að fjalla um  vináttu hetjunnar Gunnars á Hlíðarenda og Njáls hins vitra á Bergþórshvoli í  Íslendingasögunni Njálu, eða Brennu Njáls sögu.  Hún er rituð á þrettándu öld. Höfundur þessarar visnæslu sögu er óþekktur. Á tilvitnuðum  tíma voru á Íslandi ritaðar fjölmargar hetjusögur.

 

Þegar ég verð búinn að lýsa og greina vináttu Gunnars og Njáls mun ég bera hugmyndir þessa óþekkta þrettándu aldar höfundar, eins og þær koma fram í sögunni, saman við hugmyndir tveggja eldri hugsuða Aristótelesar og Cicerós. Ég mun leitast viðað bera það saman hvernig ,,vináttunni” þessu sérstaka formi mannlegra samskipta hefur verið lýst á hinum ýmsu tímum í mismunandi samfélögum.  Ég mun leitast við að greina hvað sé átt við með vináttuhugtakinu.  Hvert er innihald vináttuhugtaksins og í hvaða samhengi þrífst vináttan og hvert er hlutverk hennar.  Ég vel Aristóteles og Ciceró vegna þess að ég legg upp með þá hugmynd að höfundur Njálu hafi hliðstæðar hugmyndir og þeir Aristóteles og Ciceró og hugmyndir þeirra tveggja eru sannarlega tengdar.  Sennilega las Ciceró verk Aristótelesar.

Að mínum dómi er þetta áhugaverður samanburður. (framhald).

Hagsmunir okkar allra!

Horfði að fornkappana Ragnar Arnalds og Jón Baldvin í Silfrinu undir miðnættið og smitaðist ekki alvarlega af fortíðarhyggju.  Annars er það gott ráð að leiða saman hætta menn öðru hvoru til að fá samanburð við nútíðina.

Jón Baldvin brá ekki vana sínum og vann kappræðuna.  Jón Baldvin hefir alltaf verið á undan sinni samtíð. Og hann hefur rétt fyrir sér nú sem endranær. Vitaskuld eigum við að fara í  samningaviðræður við ESB.  Ragnar Arnalds hafði í raun það eitt fram að færa að við myndum ekki ná ásættanlegum samningum. Nú þá það. Það nær enginn árangri með því að aðhafast ekki.

Raunar þótti mér undarleg sú fullyrðing Ragnars að ESB gætti fyrst og fremst hagsmuna stórfyrirtækja og auðmanna.  Bull.  Ekkert fjölþjóðlegt samband, nema ef vera skyldi Evrópuráðið, hefur beitt sér betur fyrir hagsmunum almennings en ESB.  Bandalagið hefur á fjölmörgum sviðum lagt hömlur á alræðisvald stórfyrirtækja yfir fólki sem hefur fengið að þróast á heimaslóðum og ekki hvað síst hér.  Hér hefur þessi almannavernd gengið undir ýmsum háðsglósum manna sem engar breytingar vilja.  Nú síðast berjast starfsstéttir með kjafti og klóm gegn svokölluðum hvíldartímaákvæðum Evrópubandalagsins. Í hverra þágu skyldu þau ákvæði vera sett?

Um vináttuna

 Í ,,Lysis” samræðum Plató um vináttuna segir Sókrates að meðan ,,sumir meti mest  fína hesta, hunda, auð og heiður meti hann innilega vináttu meira en bestu dýr veraldar, meira en allt persneskt gull, meira en sjálfa kórónu einvaldsins”. Fyrir Aristótelesi er vináttan forsenda lífsins ,,....fyrir utan visku hefur maðurinn ekki þegið neitt betra úr hendi hinna ódauðlegu guða” segir Laelius í ,,De Amitica” Cicero´s.  Gríska arfleifðin færir okkur vináttu Oreste og Pylates.  Þeir voru leikfélagar í æsku, hétu því sem ungir menn, að unna hvor öðrum meira en lífinu sjálfu. Pylates sýndi að þetta voru meira en orðin tóm. Þegar Orestes var dæmdur til dauða lýsti hann því yfir að hann væri Orestes.  Frægasta vinaparið í grískum bókmenntum er Achilles og Patroculus.  Þeir námu saman í æsku, hlupu saman og börðust saman.  Sorg Achillesar eftir að félagi hans var veginn var takmarkalaus. Eftir dauða Achillesar var aska þeirra hrærð saman.  Höfundur Njálu, sem er ein af íslensku hetjusögunum, sýnir djúpan skilning á vináttu þegar hann lætur hetjuna Gunnar segja. ,,Góðar eru gjafir þínar en meira virði er þó vinátta þín.” Hugsuðir allra tíma hafa hugleitt vináttuna.  Stundum er vináttan í tísku, stundum geldur hún fordóma í garð samkynhneigða.  Hjá flestum er vináttan einn af þessum sjálfsögðu þáttum í lífinu sem maður tekur ekki eftir fyrr en hún súrnar.  Það er með vináttu eins og vatn. Þú drekkur það og svo lengi sem vatnið er hreint nýturðu þess án þess að hugsa mikið út í það.

1. Maí uppstiginn, farinn, horfinn, kemur hann aftur?

Í dag renna saman Uppstigningardagur og baráttudagur verkalýðsins 1. maí.  Dagurinn hefur verið tengdur verkalýð frá 1889 þegar samþykkt var tillaga frá Frökkum á þingi evrópskra verkalýðsfélaga í París um að 1. maí skyldi verða alþjóðlegur frídagur verkafólks.

Þessi dagur var annars rótgróinn frídagur í sunnanverðri Evrópu. Sumar og vetur mætast um þetta leyti. Kirkjan helgaði 1. maí dýrlingnum Valborgu sem var ensk prinsessa, trúboði og abbadís í Þýskalandi.

Árið 1923 var fyrst gengin kröfuganga á 1. maí á Íslandi. Dagurinn varð lögskipaður frídagur á Íslandi árið 1972 en til samanburðar má geta þess að ríkisstjórn jafnaðarmanna í Svíþjóð gerði daginn að frídegi árið 1938.

Uppstigningadagur á rætur í uppstigningu Jesú Krists til himins og er 40 dögum eftir páskadag. Jesú hafði.,samkvæmt ritningunumn, birst lærisveinum sínum af og til en varð síðan upp numinn til himins að þeim sjáandi. Frá því segir bæði í lok Lúkasarguðspjalls og í byrjun Postulasögunnar en þessar bækur eru taldar eftir sama höfund.

Kirkjan hefur gert Uppstigningadag að degi aldraðra og er helgihald dagsins yfirleitt tileinkað öldruðum.

Mér hefur alltaf þótt val á þessum degi sem dagur aldraðra svolítið kaldhæðnislegt eða húmorískt. Jafnframt orðið var við að sumir skilja hvað ég á við aðrir ekki.

Í dag þegar þessir dagar rekast saman getum við metið hvort verður ofar í hugum manna  Verkalýðsbaráttan eða Upprisan.  Hefðbundin verkalýðsbarátta hefur liðið sitt fegursta í bili. 1. maí er í nokkrum skilningi uppstiginn til himins. Spurningin hvort hann kemur aftur eins og ætlað er með frelsarann?

(Upplýsingar um 1. maí fengnar af Vísindavefnum)

Hjúkrunarfræðingar: Gefið ríkinu frest!

Þessa deilu verður að leysa. Ég þekki fólk sem er á biðlistum eftir brýnum aðgerðum. Svona deilur leggjast illa í það fólk.  Fólk á biðlistum t.d. eftir hjartaaðgerðum gæti dáið.  Þessi deila er því alvörumál. Hún gæti teygt anga sína út í kirkjugarða.  Ég skora á hjúkrunarfræðinga að gefa ríkinu frest og ég skora á ríkisvaldið að draga að sér bláa loppuna.

Einn angi þessa máls er að stéttir vilja ekki komast undir vinnutímaákvæði ESB. Ég hélt að það ætti að vera báráttumál frekar en hitt.

Hjúkrunarfræðingar funda

Kynþáttafordómar í fótbolta

það er ekkert nýtt að fólk beri sig af fíflaskap þegar það fjallar um fótbolta og ber ekki að taka of alvarlega en kynþáttafordóma sem sjá má í kommenti ungrar stúlku í bloggi við þessa frétt ætti ekki að líða.  

Víða  er unnið að því að útryma rasisma úr fótbolta. Við hér ættum ættum að sjá sóma okkar í því að gera það líka. Komment unglinga hér og annarsstaðar benda eindregið til þess að uppalendur og skólakerfi standi ekki vaktina.

Didier Drogba: Ber ekki lengur virðingu fyrir Benítez

Jón Sigurðsson snýr aftur!

Hrossið hefur hrasað með Jón Sigurðsson/Hann horfir til baka/ Upp í hlíðina og hvað sér hann: ófagra Framsóknarakra/brunna velli og kalin tún. Samt hefur hann ákveðið að snúa heim í pólitíkina aftur og fara hvergi.

Hólminn sem hann snýr aftur á heitir Morgunblað en þar tilkynnir þessi fyrrum formaður Framsóknar að tími umsóknar um aðild að ESB sé kominn. Leggst þar með gegn formanninum og fylgisveini hans á Suðurlandi en á sveif  með flestum öðrum frammámönnum og konum flokksins.  Jón Sigurðsson er að koma standandi úr fallinu.

Jón Sigurðsson sýndi foringjatakta þann stutta tíma sem hann var við stjórnvölinn í Framsóknarflokknum. Flokkurinn tapaði ekki vegna hans heldur þrátt fyrir hann. Maðurinn með nafn frelsishetjunnar átti aldrei að segja af sér.  Áfram þurfti að rækta túnin og græða akrana.

Margir fóru að dæmi Kolskeggs og héldu utan.  Þeir sem líta til baka á annað borð verða að segja B fyrst þeir sögðu A.